სტივ მაქუინის კრიმინალური დრამა შურისმაძიებელ ქვრივებზე, რომლებიც ბრძოლას უცხადებენ სასტიკ სინამდვილეს.
მძარცველების ჯგუფი მორიგი საქმის დროს იღუპება. ისინი ვიღაცამ გასცა. მათი ქვრივები გადაწყვეტენ ქმრების დაწყებული საქმე ბოლომდე მიიყვანონ, რათა ერთდროულად- გადაწყვიტონ ფინანსური პრობლემები და გაარკვიონ ვინ ,,ჩუშვა” მათი მეუღლეები.
სადებიუტო ,,შიმშილის” და ,,სირცხვილის” შემდეგ სტივ მაქუინმა ოსკაროსანი ,,12 წელი მონობაში” გადაიღო და ადგილი დაიმკვიდრა იმ რეჟისორებს შორის, რომლის მორიგ ნამუშევარს მაყურებელი თუ კრიტიკოსი ერთნაირი მოუთმენლობით ელის. მაქუინმა არც ამჯერად დააღალატა მისი კინოს მოყვარულები და კარგად დადგმული კრიმინალური დრამა შემოგვთავაზა ძლიერი მსახიობებით. ძლიერი აქ ხაზგასმითაა აღსანიშნი, რადგან ფილმი ისეთ აქტუალურ თემებსაც ეხება, როგორიც გენდერული თანასწორობაა და რეჟისორს იმ მარტოხელა ქალების მცდელობის გამოსახატავად, რომელთაც სურთ ადგილი დაიმკვიდრონ რთულ სამყაროში(თუგინდ კრიმინალურში), განსაკუთრებით დამაჯერებელი არტისტები სჭირდებოდა. ხანგრძლივი საინტერესო დიალოგები, კარგად დამუშავებული პერსონაჟები (სცენარისტ გილიან ფილის უდაო დამსახურება), შონ ბობითის ოპერატორული ნამუშევარი და ჰანს ზიმერის საუნდტრეკი კიდევ უფრო მეტად ავსებს ამ საინტერესო ფილმს.
ქვრივები (Widows)
რეჟისორი: სტივ მაქუინი
2018წ. (დიდი ბრიტანეთი, აშშ)
