Coldplay-ის მეათე ალბომი, სახელწოდებით “Moon Music”
ბრიტანული როკ-ჯგუფის, Coldplay-ის მეათე ალბომი, სახელწოდებით “Moon Music” გერმანულმა ლეიბლმა, Parlophone 4 ოქტომბერს გამოუშვა. ამავე ლეიბლმა, 2000 წელს გამოსცა ბენდის სადებიუტო ალბომი, სახელწოდებით “Parachutes”, რომელიც გრემის მფლობელი გახდა, როგორც წლის საუკეთესო ალტერნატიული ჩანაწერი.
Coldplay-ის მუსიკალური მოგზაურობა საკმაოდ საინტერესოა, განსაკუთრებით მაშინ, როცა ვაკვირდებით, როგორ შეიცვალა ჯგუფის ჟღერადობა და სტილი. მათი პირველი სამი ალბომი “Parachutes”, “A Rush Of Blood To The Head” და “X&Y” გამოირჩევა ძლიერი ტექსტებით, მელოდიური ატმოსფეროთი, მელანქოლიური და ემოციური განწყობით და სრულიად განსხვავდება დღევანდელი ნამუშევრებისგან. ჯგუფის ბოლო რამდენიმე ალბომი უფრო “მსუბუქია”, მარტივად მოსასმენი და დასამახსოვრებელი პოპ-მუსიკა, რომელიც ნაკლებადაა კონცენტრირებული სიღრმეებზე და შექმნილია ფართო აუდიტორიისთვის.
“Moon Music” ამის ნათელი მაგალითია. მას აკლია სიღრმე, ინტენსიურობა, დინამიკა, ემოციურობა და გაჯერებულია მარტივი ტექსტებით. თითქოს დრო, როდესაც Coldplay-ის მუსიკა ასე პირდაპირ და ღრმად გვეხებოდა, აღარ არსებობს, თუმცა, ეს ცვლილება ბევრი მსმენელისთვის მაინც მიმზიდველია.
ალბომის პირველი კომპოზიცია სახლწოდებით “MOON MUSiC” ყველაზე მეტად ჰგავს ჯგუფის ძველ მუსიკას, დანარჩენი ტრეკები კი სრულიად სხვა მიმართულებით ვითარდება, ეს არის “ჰიტების” შექმნის მცდელობა, რაც წარმატებულია და მსოფლიოს უდიდეს სტადიონებს ავსებს. ერთ-ერთი ასეთი ჰიტია “WE PRAY”, რომელიც პირველად 23 აგვისტოს მოვისმინეთ.
მეათე სტუდიურ ნამუშევარში ბევრი კოლაბორაციაა, ისეთ მომღერლებსა და მუსიკოსებთან, როგორებიც არიან Jon Hopkins, Burna Boy, Little Simz, Ayra Starr, TINI, Elyanna. ამ თანამშრომლობით იგრძნობა ჯგუფის ძალისხმევა, უფრო მასშტაბური, მრავალფეროვანი და კოპმლექსური გაეხადა ალბომი, რომელიც აერთიანებს პოპ-როკს, ემბიენთს, ჰიპ-ჰოპს, პოპს და EDM-ს.
შეიძლება ითქვას, რომ “Moon Music”-ის მთავარი თემა სიყვარული და მისი მრავალმხრივი გამოხატულებაა, როგორც უნივერსალური ენერგია, რომელიც აერთიანებს კაცობრიობას და მას სამყაროში თავისი ადგილის პოვნაში ეხმარება.
Album: Moon Music
Release date: October 4, 2024
Label: Parlophone Records Limited
Genre: Alternative
ალბომში 11 ტრეკია 44 წუთი ხანგრძლივობით
