How to have sex ანუ როგორ არ უნდა გვქონდეს სექსი.
2023 წლის კანის ფესტივალის un certain regards ჯილდოს მფლობელი ხდება ბრიტანელი კინორეჟისორის მოლი მანინგ ვოლქერის პირველი სრულმეტრაჟიანი ფილმი How to Have Sex, რომელიც უმთავრესად რეჟისორის გამოცდილების ეკრანიზაციაა და ერთგვარი გაგრძელება ან სრულყოფაა მისი მოკლემეტრაჟიანი სურათის Good Thanks, You? (2020). ორივე ფილმი სექსუალური ძალადობის გამოცდილების მიღებასა და მის გააზრებას ეხება, იმის გარკვევას თუ რამდენად რეალურია რასაც გრძნობ და შეგიძლია თუ არა მომხდარს გაუპატიურება დაარქვა?
How to Have Sex მეგობრების, ტარას, სკაის და ემის საზაფხულო თავგადასავალს გვიყვება საბერძნეთის კუნძულზე, რომელიც სპეციალურად ისე არის მოწყობილი, რომ ახალგაზრდებმა ალკოჰოლის, სექსისა და მუსიკის ფონზე უწყვეტად გართობა შეძლონ. ფოკუსი ფილმში ტარაზეა, ვისთვისაც ეს ადგილი შესაძლებლობაა პირველად ჰქონდეს სექსი და გადალახოს ქალწულობის კომპლექსი, რაც მისი მეგობრების კომენტარებისა და დამოკიდებულების გამო სირცხვილადაა ჩაბეჭდილი მის ცნობიერში. “მე არასდროს” თამაშის დროსაც სკაი განზრახ ახსენებს ამ საკითხს, თითქოს დასცინის, რადგან იცის, რომ ტარა აუცილებლად ცუდად იგრძნობს თავს.
მსგავსი მენტალური ძალადობა, რომ ტარას აუცილებლად უნდა ჰქონდეს სექსი, მისთვის გადაწყვეტილების მიღების დაჩქარებას განაპირობებს და “საუკეთესო დასვენება, რომელიც ჰქონიათ,” ტარასთვის ცხოვრების ყველაზე ცუდ გამოცდილებად გადაიქცევა. თუ დასაწყისში გოგოები ერთად არიან და იცინიან, ბოლოსკენ ტარა მარტოა და მუსიკის ნაცვლად მისი გულისცემის ხმა გვესმის.
მოლი მანინგ ვოლქერის მთავარი მიზანი How to Have Sex-ში სექსის დროს თანხმობის ცნების გაგებაა. ბაჯასთვისაც (ბიჭი, რომელსაც ტარა ფილმის დასაწყისში იცნობს) “ყველაზე დიდი რამ რაც მომხდარა,” ანუ საჯარო ორალური სექსი, რომელიც არც კი ახსოვს, არაფხიზელ მდგომარეობაში მოხდა, ისევე როგორც ტარამ ორივე სექსუალური გამოცდილება არაცნობიერ კონდიციაში მიიღო და ვერ ხვდება, როგორ უთხრას მეგობრებს, რომ ის, რაც მათი აზრით ტარასთვის საუკეთესო ღამე უნდა ყოფილიყო, მისთვის მხოლოდ კოშმარია.
“ჩემთვის კანონი არასდროს მუშაობდა და ვფიქრობ, სრულად ჩვენზე არ იმუშავებს. ამიტომ უნდა ვიყოთ უფრო მეტად ადამიანურები, რაც იმაზეა დამოკიდებული როგორ ვასწავლით ერთმანეთს და ჩვენს შვილებს, რამდენად ვცემთ პატივს სხვებს და გვექნება კარგი სექსი, როგორც ერთმანეთის თანასწორებს.” – ამბობს მოლი მანინგ ვოლქერი How to Have Sex-ზე ლაპარაკის დროს.
როგორ გვქონდეს სექსი (How to Have Sex)
რეჟისორი: მოლი მენინგ უოლკერი
2023წ. (UK)
ხანგრძლივობა: 1 საათი 31 წუთი
Add to favorites 
