ყოველ ადამიანშია სამოთხეც და ჯოჯოხეთიც. და ნებისმიერი გადაწყვეტილებისას, როცა საქმე ადამიანის სიცოცხლეს ეხება ამ ორის გავლა შეიძლება ნებისმიერს მოუწიოს, მიუხედავად მისი სოციალური სტატუსისა. 58 წლის შემდეგაც კი აკირა კუროსავას ,,მაღლა და ქვემოთ” იგივენაირად დაგვაფიქრებს ადამიანის შინაგან ბუნებაზე და სოციალურ უთანასწორობაზე როგორც მაშინ, როცა ეს ფილმი ეკრანებზე გამოვიდა.
ფეხსაცმლის ფაბრიკის მფლობელს და წარმატებულ ბიზნესმენს, გონდოს ტელეფონზე გამტაცებელი ურეკავს და შვილის განთავისუფლების სანაცვლოდ დიდ თანხას ითხოვს. გონდო თანახმაა გადაიხადოს გამოსასყიდი, მაგრამ აღმოჩნდება, რომ გამტაცებელმა შეცდომით გონდოს მძღოლის შვილი გაიტაცა. გონდო ძალიან რთული არჩევანის წინაშე დგება: გადაიხადოს სხვის შვილში თანხა და ამით გააკოტროს ბიზნესი თუ უარი თქვას გამოსასყიდის გადახდაზე და ადამიანის სიცოცხლე საფრთხის ქვეშ ჩააგდოს?
არ შეიძლება არ აღფრთოვანდე ამ ფილმის საოცარი სიზუსტით დაყენებული კადრებით, ყოვლგვარ ზედმეტს მოკლებული დიალოგებით და მსახიობების, განსაკუთრებით კი ტოსირო მიფუნეს უნაკლო თამაშით.
მაღლა და ქვემოთ (Tengoku to jigoku)
რეჟისორი: აკირა კუროსავა
1963წ. (იაპონია)
